ताप्लेजुङ  – फुुङलिङ नगरपालिका ४ भानुस्कुल छेउ कञ्चनजङ्घा टोलमा भएको आगलागीबाट ३६ लाख मूल्य बराबरको क्षति भएको प्रारम्भिक अनुमान प्रहरीले गरेको छ । मङ्गलबार राती महेन्द्र उपरकोटी र कल्पना तोलाङ सार्कीको एकतले पक्की घरमा आगलागी भएको थियो ।
विद्युत सर्ट भई आगलागिहुँदा झोला बनाउने गोदामका सरसामान जलेको जिल्ला प्रहरी कार्यालय ताप्लेजुङका प्रहरी निरीक्षक एवं सूचना अधिकारी विवेक बस्नेतले जानकारी दिए । बस्नेतका अनुसार तीन लाख बराबरको ब्याग बनाउने मेसिन चार थान, २० लाख बराबरको तयारी ब्यागहरू र १३ लाख बराबरको ब्याग बनाउन प्रयोग गरिने उपकरण सहितका सामग्री जलेको छ ।
स्थानीयवासी, नेपाल प्रहरी, नेपाली सेना सहितका सुरक्षा निकायले आगो नियन्त्रणमा लिएको उनले जानकारी दिए । आगलागी बारे थप अनुसन्धान भई रहेको प्रहरीले जनाएको छ ।