ताप्लेजुङ – मङ्गलबार दिउसो वर्षा सहितको हावाहुरीले पाथीभरा क्षेत्रको काफ्लेपाटी बलुडाँडा क्षेत्रमा क्षति पुर्याएको छ । स्थानीयका अनुसार अपरान्ह ४ बजे देखिको वर्षा र हावाहुरीले घरका छानाहरू उडाएको छभने फलैचा, चौतारा, होर्डिङबोर्ड भत्काउनुका साथै उडाएको छ ।
तत्कालीन पर्यटन मन्त्री रविन्द्र अधिकारी सवार हेलिकप्टर दुर्घटनाको समयमा जस्तै हुन्डरी चलेको स्थानीयले बताएका छन् । काफ्लेपाटी देउमान लामाको घरको छानाको सबै जस्तापाता छानु उडाएको छभने दल बहादुर पौडेलको भान्साघरको छाना उडाएको स्थानीय राजमणि पोख्रेलले जानकारी दिए । सोलार प्लेटहरू झरेर भुईँमा फुटेका र छरपष्ट भएका छन् ।
माथिल्लो फेदी होटल व्यवसायी सङ्घका अध्यक्ष इन्द्रनारायण भट्टराईका अनुसार बलुडाडामा डिल्लीराम भट्टराई खत्रीको घर र विश्वकर्मा पार्टी पूर्णरुपमा भत्काएको छ । खगेन्द्र केरुङ लिम्बूको छानो उप्काएर जङ्गलमा थुपारेको, टेकमान भट्टराई खत्रीको घरको छानो उप्काएको र भञ्ज्याङ खाजाघर नजिकको फलैँचा उप्काएर जङ्गलमा पुर्याएको भट्टराईले बताए ।
यो क्षेत्रमा असिनापानी परेको र भुईँको झारपात तथा रुखका हाँगा झर्नेगरेको असिना परेको स्थानीयले बताएका छन् । भट्टराईका अनुसार यस्तो आधि सहितको हुन्डरी अलिक लामो समय चलेको भए धेरैनै क्षति हुने जोखिम रहेको थियो ।