ताप्लेजुङ – नेकपा एमाले कोशी प्रदेश कमिटीले एमाले ताप्लेजुङका निवर्तमान अध्यक्ष बलबहादुर साम्सोहाङलाई आत्मालोचना सहित कारबाही फुकुवाको निर्णय गरेको छ । मणि शङ्कर पोमुको हकमा भने आठ महिनासम्म निलम्बन गर्ने र त्यसपछि आत्मालोचना पत्र पठाए कारबाही फुकुवा हुने निर्णय गरेको छ ।
नेकपा एमाले कोशी प्रदेश कमिटी अध्यक्ष घनश्याम खतिवडाले प्रदेश कमिटीले यस्तो निर्णय गरेको बताए । आत्मालोचनाको विषय भनें पार्टीको विधि, विधान र पद्धति अनुसारको हुने उनले जनाएका छन् । ‘उहाहरुको छानविनकालागि तीन सदस्यीय समिति बनाएका थियौं, उहाँहरूले प्रतिवेदन बुझाउनु भयो,’ खतिवडाले भने, ‘प्रतिवेदनको आधारमा बलबहादुर जिलाइ आत्मालोचना पत्र पठाएपछि कारवाही फुकुवा गर्ने र मणि जिको हकमा घटना भएको मितिदेखि लागू हुनेगरि आठ महिना निलम्बन हुने र त्यसपछि आइन्दा यसो गर्दिन भनेर आत्मालोचना सहितको पत्र पठाए र पार्टी काममा फर्किए कारवाही फुकुवा गर्ने निर्णय भएको छ ।’
गत बैशाखमा राष्ट्रिय युवा सङ्घ ताप्लेजुङको दशौं जिल्ला अधिवेशनको क्रममा विवाद भएको थियो । जिल्ला कमिटीले प्रदेश कमिटीमा कारवाहीका लागि पत्राचार गरेपछि प्रदेश कमिटी उपाध्यक्ष टिकाराम चेम्जोङको संयोजकत्वमा समिति गठन गरिएको थियो । साम्सोहाङ प्रदेश कमिटी सल्लाहकार परिषद सदस्य र पोमु प्रदेश कमिटी पर्यटन विभाग सचिवको जिम्मेवारीमा रहेकाले प्रदेश कमिटीले कारवाही गरेको जनाएको छ .