ताप्लेजुङ – अपर तमोर जलविद्युत आयोजनाको चाइनिज कामदार राख्न बनाइएको ब्यारेकमा शुक्रवार बिहान तोडफोड भएको छ । आयोजनाका अनुसार १३ वटा झ्याल, ६ वटा ढोका, १ थान हलोजेन बत्ती लगायतका संरचनामा तोडफोड भएको हो ।

तमोर इनर्जी आयोजनाका संयोजक सम्झना थापा क्षेत्रीले अपर तमोर जलविद्युत आयोजना विरुद्ध सङ्घर्ष गर्दै आएको समुहले तोडफोड गरेको दावी गरिन् । संयोजक वीरबल लिङ्खिम स्वयंपनि रहेको उनको दावी छ । उनीहरूले गरेको क्षतिको पूर्ण विवरण शुक्रवार बेलुकासम्ममा तयार हुने सम्झनाले बताइन ।

‘अपर तमोर सङ्घर्ष समिति’ का संयोजक वीरबल लिङ्खिमलेभनें आफूहरूले कुनैपनि तोडफोड नगरेको र शान्तीपूर्ण आफ्ना मागहरू उठाइरहेको दावी गरे । ‘मैले नेतृत्व गरेको आन्दोलन शान्तिपूर्ण छ,’ उनले टेलिफोनमा भने, ‘आज तोडफोड भयो भन्दा मनै अचम्ममा परेको छु । हामीलाई नै दोष लगाउँदा झन अचम्म भएको छु । कतैबाट आन्दोलन दबाउन घुसपैठ भएको होे की भन्ने आशङ्का भएको छ ।’  यहा सङ्घर्ष समितिले साउन ११ गतेदेखि ढुवानीका साधनमा रोक लगाउने लगायतका आन्दोलनका कार्यक्रम गर्दै आएको छ । लिम्बू समुदायको मुन्धुम स्थलमा हाइड्रोपावर नबनाउन सङ्घर्ष समितिनै बनाएर स्थानीय आन्दोलित भएका छन् ।

प्रहरीले भनेँ १०/१२ जनाको सङ्ख्यामा मानिसहरू आई कामदार बस्ने ब्यारेकमा तोडफोड गरेको भन्ने खबर प्राप्त हुनासाथ प्रहरी चौकी सिवाबाट टोली खटाइएको जनाएको छ । ‘सिवा चौकीबाट प्रहरी सहायक निरीक्षकको नेतृत्वमा घटनास्थलमा पुगेर बुझ्दा तोडफोड भएको पाइयो,’ प्रहरी निरीक्षक एवं जिल्ला प्रहरी कार्यालयका सूचना अधिकारी विवेक बस्नेतले भने, ‘तोडफोड गर्ने मानिसहरू फरार भएकाले उनीहरूको खोजतलासलाई तिव्रता दिएका छौँ ।’ थप अनुसन्धानका लागी जिल्ला प्रहरी कार्यालय ताप्लेजुङबाट प्रहरी निरीक्षक रोहित कुमार शर्मा बढईको नेतृत्वमा थप टोली परिचालन गरिएको प्रहरी नायब उपरीक्षक वेद प्रसाद गौतमले जानकारी दिए । तोडफोड गर्नेलाई कुनैपनि हालतमा अनुसन्धानको दायरामा ल्याउने उनको दावी छ ।